ለተቸገሩና አቅም ለሌላቸው ወገኖች የሚደረግ በጎ ተግባር የዜጎችን የመረዳዳት ባህል እንደሚያጠናክር ተገለፀ

ሆሳዕና 25/12/2018 

በሀድያ ዞን ምዕራብ ባደዋቾ ወረዳ በዳነማ ከተማ የማዕከላዊ ኢትዮጵያ ክልል ፕላን ልማት ቢሮ ለአንዲት አቅመ ደካማ እናት ቤት በመገንባት አስረክቧል።

የማዕከላዊ ኢትዮጽያ ክልል ፕላን ቢሮ ኃላፊ አቶ ዳንኤል ዳምጠው በዚህ መርሃ ግብር ተገኝተው እንዳሉት ይህ ለተቸገሩና አቅም ለሌላቸው ወገኖች የሚደረግ በጎ ተግባር በሰማይም በምድር ዋጋ ያለው በመሆኑ ይህን የመረዳዳት ባህልን አጠናክሮ ማስቀጠል እንደሚገባ ተናግሰዋል።

የክልሉ ወጣቶችና ስፖርት ቢሮ ኃላፊና የክረምት በጎ ተግባር አብይ ኮሚቴ ምክትል ኃላፊ አቶ ጌታቸው ለሊሾ በበኩላቸው፤ ላለፉት 9 ዓመታት በጠቅላይ ሚንስትር ሃሳብ አመንጪነት ተጀምሮ በርካታ በጎ ተግባራት መከናወናቸውን ገልፀዋል።

በክልሉ በ2018 በክረምት በጎ ተግባር ከ2000 በላይ ቤቶች በ3 ወር እየተሰራ መሆኑን ጠቅሰው፤ የተቀሩ ቤቶችም አመራሩና ኮሚቴው በልዩ ትኩረት በመስራት በአጭር ጊዜ ውስጥ እንደሚጠናቀቅ አስታውቀዋል።

የክልሉ ፕላንና ልማት ቢሮ ምክትል ኃላፈ ዶ/ር ፈለቀች ተ/ማሪያም በበኩላቸው ይህ በጎ ተግባር በፈቃደኝነት የሚሰራና የዜጎችን የመረዳዳት ባህል የሚዳብርበት በመሆኑ ኮሚቴ በማዋቀርና በቅንጅት በመስራት በአጭር ጊዜ ማከናወን መቻሉን ገልጸዋል።

የቤቱ ግንባታ የክረምት በጎ ተግባር አንዱና ዋነኛ ተግባር አካል በመሆኑ በክልሉ ፕላንና ልማት ቢሮ ማናጅመንትና አስተባባሪነት 1 ሚሊዮን አምስት መቶ ሺህ ብር ከነ ሙሉ ቤት ዕቃ ወጪ ማስወጣቱን ገልጸዋል።

የምዕራብ ባደዋቾ ወረዳ ዋና አስተዳዳሪ ዶ/ር ሙላቱ ወ/ሃና የክልሉ ፕላን ልማት ቢሮ ላሳየው ሰው ተኮር ሰብዓዊ ተግባር አመስግነዋል።

በዚህ በጎ ተግባር ቤት የተገነባላቸው ወ/ሮ አለሜ ዋቺሶ ከዚህ ቀደም የሚኖሩበት ቤት ዝናብና ጎርፍ እያስገባ ያስቸግራቸው እንደነበረ ገልፀው፤ አሁን ላይ በተደረገላቸው የቤት ግንባታ ድጋፍ እጅግ እንዳስደሰታቸው ተናግረዋል።

በዙሪያቸው አጋዥ እንዲሁም ጧሪ ቀባሪ እንደሌላቸው የተናገሩት ወ/ሮ አለሜ የክልሉ ፕላን ቢሮ ያሳያቸው አለኝታነት በውስጣቸው ትልቅ ተስፋ መጫሩን በመግለጽ ለዚህ በጎ ተግባር የበኩላቸውን ትብብር ያደረጉ አካላት አመስግነዋል።

በተመሳሳይ ለ5 ወላጅ አጥ ተማሪዎች የመማሪያ ቁሳቁስ ፣ ለ5 አረጋውያን የምግብ ዘይትና ዱቄት እናንዲሁም ለ20 የድሃ ድሃዎች አልባሳትና የንጽህና መጠበቂያ ሳሙና ድጋፍ የተደረገ ሲሆን ድጋፍ የተደረገላቸው አካላትም አመስግነዋል።